മലയാളം: തെക്കൻ കേരളത്തിലെ ദേവീക്ഷേത്രങ്ങളിൽ നടത്തുന്ന പലതരം പടയണി ഉത്സവങ്ങളിൽ സവിശേഷമായ ചടങ്ങുകൾ ഉള്ള ഒന്നാണ് നിലമ്പേരൂർ പടയണി. ചിങ്ങമാസത്തിലെ തിരുവോണത്തിന്റെ പിറ്റേദിവസമായ അവിട്ടം മുതൽ ആരംഭിച്ച് 16 ദിവസം നീണ്ടുനിൽക്കുന്ന ഒരു ഉത്സവമാണ് ഇത്. മുപ്പതും നാൽപ്പതും അടി ഉയരമുള്ള അരയന്നത്തിന്റെയും മറ്റും വലിയ രൂപങ്ങൾ ഈ ദിവസങ്ങളിൽ കെട്ടി ഉണ്ടാക്കുകയും അവസാനദിവസം ഇവയെല്ലാം ഒരുമിച്ചു കൊണ്ടുവരികയും ചെയ്യും. ഓരോ ദിവസവും പലതരം അനുഷ്ഠാനങ്ങളും കളികളും പടയണിയുടെ ഭാഗമായി ഉണ്ടാകാറുണ്ട്. ചേരമാൻ പെരുമാളുമായി ബന്ധപ്പെട്ട ഐതിഹ്യമാണ് പടയണിക്ക് പിന്നിലുള്ളത്.